Tilnefningar og umsagnir dómnefndar vegna verka ársins 2006

Popp - Hljómplata ársins

Hafdís Huld: Dirty Paper Cup

Frábær frumraun söngkonunnar sem byrjaði að ferðast um heiminn með Gus Gus þegar hún var aðeins 15 ára gömul.

Benni Hemm Hemm: Kajak

Afskaplega mikill gleðigjafi. Popp með lúðrasveitaívafi er sjaldgæft og því sérstakt.

Sálin & Gospel: Lifandi í Laugardalshöll

Sálin er hljómsveitin sem íslenska þjóðin elskar að elska, aftur og aftur...

Rokk & jaðar - Hljómplata ársins

Reykjavík!: Glacial Landscapes, Religion, Opression & Alcohol

Ein ferskasta rokkplata sem komið hefur út á Íslandi í langan tíma.

Pétur Ben: Wine for my Weakness

Pétur er mikill lagahöfundur sem gaman verður að fylgjast með í framtíðinni og sjá þróast. Honum virðast allir vegir færir.

Lay Low: Please Don´t Hate Me

Heillandi nýliði sem kom, sá og sigraði með sinni fyrstu plötu. Frábær frumraun rísandi listamanns!

Dægurtónlist - Hljómplata ársins

Ýmsir: Pældu í því sem pælandi er í

Lög Megasar fá nýtt líf í ferskum útsetningum ýmissa og ólíkra flytjenda. Skemmtileg fjölbreytni sem undirstrikar snilld höfundarins... það er margt í mörgu.

Bogomil Font og Flís: Bananaveldið

Hressandi plata með suðrænni stemmningu og virkilega snjöllum textum héðan úr norðri. Skemmtilegt, fyndið og beitt.

Baggalútur: Aparnir í Eden

Baggalútsmenn hafa náð að fullkomna stílinn sinn með hæfilegri blöndu af kántrítónlist og kímni.

Ýmis tónlist - Hljómplata ársins

Ghostigital: In Cod We Trust

Besta rafrokkplata sem komið hefur út á Íslandi; hrá, frumleg og kraftmikil.

Barði Jóhannsson: Haxan

Falleg tónlist og stendur fyrir sínu án kvikmyndarinnar. Klassík fyrir popparana... ?-).

Skúli Sverrisson: Sería

Einn óvæntasti gleðigjafi ársins. Yndislegar útsetningar, flutningur hnökralaus, söngur Ólafar Arnalds frábær. Algjör gullmoli!

 

Popp, rokk & jaðar, dægurtónlist og ýmis tónlist deila með sér eftirfarandi verðlaunum:

Flytjandi ársins

Baggalútur

Hrikalega flott hljómsveit á tónleikum, vel heppnaðar plötur, frábærir textar og æðislegar útsetningar.

Björgvin Halldórsson

Annað af B-unum stóru sem átti glæsilegan hljómleik á árinu. SöngvarINN!

Bubbi Morthens

Hitt stóra B-ið... ótrúlegt; einn kall með gítar opg heil íþróttahöll tekur undir fullum hálsi - með textana á hreinu.

Lag ársins

Baggalútur og Björgvin Halldórsson: Allt fyrir mig

Björgvin Halldórsson sýnir okkur hvernig sá syngur sem röddina hefur - og með húmor. Slær sjálfum sér eiginlega við. Hann lyftir laginu með yfirvegun í háar hæðir.

Lay Low: Please Don´t Hate Me

Gítarleikur, söngur, laglína, texti og túlkun... allt gengur upp. Næstum fullkomið lag!

Ghostigital: Not Clean

Stríðsrekstur Íslendinga (þorskastríðið) gerður upp í kraftmiklu og stórskemmtilegu lagi. Fortíð og nútíð samtvinnuð í framtíðarlegum hljómum.

Söngkona ársins

Regína Ósk

Eftir að hafa staðið bakatil á sviðinu árum saman og sungið bakraddir með öllum helstu söngstjörnum landsins stekkur Regína Ósk fram fyrir flesta kollega sína á vel heppnaðri plötu.

Andrea Gylfadóttir

Andrea er og verður ein af betri söngkonum sem Íslendingar eiga og hafa átt. Hún er sjúkleg á nýju Todmobile plötunni, og stendur sig líka vel með Birni Thoroddsen. Sýnir enn og aftur hversu fjölbreytt hún er og mikill listamaður.

Lay Low

Ein sérstakasta gulrótin í matjurtagarðinum þetta misserið. Sérstakur, nýr og spennandi tónn.

Söngvari ársins

Bubbi Morthens

Átti frábært ár, spilaði fyrir 5000 í Laugardalshöll á afmælisdaginn sinn þegar hann varð fimmtugur, og tugi þúsunda í sjónvarpinu þar að auki í leiðinni. Óþarfi að segja meira.

Friðrik Ómar

Stimplar sig sterkur inn með sinni fyrstu sólóplötu og sýnir það og sannar að hann er kominn til að vera.

Pétur Ben

Ein af björtustu vonum íslensks tónlistarlífs 2006.

 

Jazz

Hljómplata ársins

Atlantshaf: Atlantshaf

Atlantshaf er fyrsta skífa samnefndrar hljómsveitar, en þeir félagar hafa numið vestan hafs og austan. Þetta er evrópskur jazz eins og hann gerist bestur með rætur í tónlist Miles Davis fyrir rafvæðinguna.

<!--[if !supportEmptyParas]--> <!--[endif]-->

Jóel Pálsson: Varp

Varp er fjórða hljómsveitarskífa tenórsaxófónleikarans og tónskáldsins Jóels Pálssonar. Á þessari skífu heyrum við fullþroska listamann, sem hefur tekist að móta einstaklega persónulegan stíl með rætur í norrænum jazzi, þar sem séríslenskum tóni bregður jafnt fyrir sem alþjóðlegum. 

<!--[if !supportEmptyParas]--> <!--[endif]-->

Tómas R. Einarsson: Romm Tomm Tomm

Romm Tomm Tomm er þriðja skífa Tómasar R. Einarssonar þar sem hann leiðir saman jazz og kúbanska tónlist. Þessi samruni tekst einstaklega vel þar sem vel byggðar tónsmíðar haldast í hendur við frábæra jazzsólóa undir kúbönskum hryn.

<!--[if !supportEmptyParas]--> <!--[endif]-->

<!--[if !supportEmptyParas]--> <!--[endif]-->

Flytjandi ársins

Hilmar Jensson

Hilmar er jafnvígur á flestar tegundir jazz- og spunatónlistar. Með tríói sínu Tyft hefur hann rutt nýjar brautir, en hann er jafn skapandi í glæsilegum einleiksspuna sínum á Varpi Jóels Pálssonar.

<!--[if !supportEmptyParas]--> <!--[endif]-->

Kristjana Stefánsdóttir og kvartett  Sigurðar Flosasonar

Kristjana Stefánsdóttir er ókrýnd drottning íslenskrar jazzsönglistar. Í ár hefur hún unnið margan listrænan sigur,  ekki síst er hún hljóðritaði 24 lög Sigurðar Flosasonar ásamt kvartetti höfundar sem skipaður er fulltrúum þriggja kynslóða íslenskra jazzleikara.

<!--[if !supportEmptyParas]--> <!--[endif]-->

Útlendingahersveitin

Í Útlendingahersveitinni leika helstu snillingar bíboppsins á Íslandi. Þeir búa víðsvegar í veröldinni, en hafa komið nokkrum sinnum saman til að leika tónlist sína jafnt sem standarda. Þroskaðir listamenn með áratuga reynslu og þekkingu á  klassískum jazzi.

<!--[if !supportEmptyParas]--> <!--[endif]-->

<!--[if !supportEmptyParas]--> <!--[endif]-->

Lag ársins

Ásgeir Ásgeirsson: Passing through

Titillag nýrrar skífu gítarleikarans Ásgeirs Ásgeirssonar þar sem honum tekst að skrifa eftirminnilega laglínu sem jafnframt er uppspretta líflegs spuna.

<!--[if !supportEmptyParas]--> <!--[endif]-->

Einar Valur Scheving: Líf

Undurfögur ballaða, sem minnir um margt á hinar klassísku ballöður jazzins, en er fyrst og fremst íslensk í einfaldleika sínum.

<!--[if !supportEmptyParas]--> <!--[endif]-->

Jóel Pálsson: Innri

<!--[if !supportEmptyParas]--> <!--[endif]-->

Upphafsópus Varps Jóels Pálssonar. Rafrænn hrynur undirstrikar norrænar rætur höfundar sem blæs magnþrungna laglínu sína glæsilega.

Sígild og samtímatónlist

Hljómplata ársins

 

Tónamínútur

Flautuverk Atla Heimis Sveinssonar.
Flytjendur: Áshildur Haraldsdóttir, Anna Guðný Guðmundsdóttir, Atli Heimir Sveinsson og Kristinn H. Árnason.

Framúrskarandi flutningur Áshildar Haraldsdóttur á öllum flautuverkum eins fremsta tónskálds þjóðarinnar. Verkin spanna mikið litróf eins og Atla Heimis er von og vísa, samin við ólík tækifæri og gefur það breiða og litríka mynd af tónskáldaferli hans. Umgjörð öll eins og best verður á kosið.

Í rökkri

Sönglög Magnúsar Blöndals Jóhannssonar.
Flytjendur: Ásgerður Júníusdóttir, Árni Heimir Ingólfsson og fleiri.

Mjög metnaðarfull útgáfa á sönglögum eins merkasta tónskálds Íslands en fæst laganna hafa nokkru sinni komið út áður. Að auki hljóma rafrænar endurvinnslur nokkurra tónskálda af yngri kynslóð á sönglögum Magnúsar og er það mjög í anda þessa merka frumkvöðuls á sviði íslenskrar raftónlistar. Túlkun Ásgerðar Júníusdóttur og Árna Heimis Ingólfssonar á söngperlum Magnúsar Blöndals er hrífandi og öll umgjörð og hljóðvinnsla plötunnar er afar heilsteypt.

Þorlákstíðir

Flytjendur: Voces Thules

Vönduð og glæsileg útgáfa í alla staði og einstök heimild um tónlistariðkun Íslendinga á miðöldum. Flutningur Voces Thules er afar innlifaður og sannfærandi og hljóðvinnsla og umgjörð eins og best verður á kosið. Algert tímamótaverk og merkt innlegg í sögu þjóðar.

Flytjandi ársins

  

Frank Aarnink slagverksleikari

Frank Aarnink hefur tekið afar virkan þátt í íslensku tónlistarlífi á undanförnum árum með Sinfóníuhljómsveit Íslands, CAPUT, Kammersveit Reykjavíkur, Íslensku óperunni svo eitthvað sé nefnt og sýnt og sannað listræna getu og metnað. Einleikstónleikar hans í Norræna húsinu á haustmánuðum voru sérlega metnaðarfullir og vel heppnaðir þar sem hann lék nýlegar tónsmíðar fyrir slagverk, þar af verk sem var sérsamið fyrir hljóðfæraleikarann. Kammertónleikar í kammertónlistarröð Sinfóníuhljómsveitar Íslands þar sem Frank gegndi stóru hlutverki voru einnig til marks um að hér er afburða hljóðfæraleikari á ferð.

Stefán Jón Bernharðsson hornleikari

Starf Stefáns Jóns Bernharðssonar með Sinfóníuhljómsveit Íslands, Kammersveit Reykjavíkur, Íslensku óperunni og ýmsum kammerhópum sýnir svo ekki verður um villst að hér er einn snjallasti hljóðfæraleikari landsins á ferð, með tæknilega yfirburði og mikið músíkalskt næmi. Síðastliðið sumar vann hann það þrekvirki að leika hornpartinn í tríói Ligetis á Kirkjubæjarklaustri en sá flutningur fékk frábærar viðtökur og gagnrýni. Ekki má gleyma árangri hans í stærra samhengi en að undanförnu hefur Stefán unnið til verðlauna í þremur alþjóðlegum hornleikarakeppnum.

Víkingur Heiðar Ólafsson píanóleikari

Víkingur Heiðar Ólafsson hefur sýnt það og sannað að hann er í hópi bestu píanóleikara landsins þrátt fyrir ungan aldur. Afköst hans á árinu 2006 eru með ólíkindum og hefur hann unnið hvern listsigurinn á fætur öðrum, á Kirkjubæjarklaustri, með Kammersveit Reykjavíkur, CAPUT og Sinfóníuhljómsveit Íslands. Verkefnaskrá hans er víðfeðm eins og sjá má af tónleikum hans hérlendis á árinu þar sem hann hefur spilað jöfnum höndum Mozart og Beethoven, Ligeti og Snorra Sigfús Birgisson en hvert verkefnið á fætur öðru hefur hann leyst af hendi með glæsibrag og sýnt mikinn listrænan metnað.

 

Tónverk ársins

 

Áskell Másson: Fiðlukonsert

Áskell Másson hefur verið sérlega afkastamikill og skapandi á árinu 2006. Fiðlukonsertinn er eitt nokkurra verka hans sem frumflutt voru á árinu en auk hans má nefna verkin Bois chantant, Quatrain og Innhverfar sýnir. Fiðlukonsertinn ber sterk höfundareinkenni tónskáldsins, kraft og hrynræna skerpu, litauðgi og einstaka færni í að skrifa fyrir hljóðfæri.

Hugi Guðmundsson: Equilibrium IV

Hugi hefur þrátt fyrir ungan aldur þegar þróað með sér afar persónulegt og heillandi tónmál sem heyra má í þessu verki, ferskt og klisjulaust. Lifandi og rafræn hljóð eru afar fallega samofin og í verkinu býr lágvær en seiðmagnaður kraftur sem nær að fanga hlustandann.

Karólína Eiríksdóttir: Skuggaleikur

Karólínu nær á sannfærandi hátt að halda öllum þráðum saman í þessu stóra og mikla verki og dregur fram mjög sterka og djúpa mynd af magnaðri sögu. Ekki má gleyma þætti skáldsins Sjón í verkinu sem höfundur óperutexta. Einstakt tónmál Karólínu fer ekki á milli mála hér, gegnsætt og úthugsað, hljóðfærasamsetningin skemmtileg og val söngradda sömuleiðis. Karólínu tekst einstaklega vel að skrifa fyrir þessa samsetningu.

Myndband ársins

Trabant: The One
- höfundar myndbands: Reynir Lyngdal og Trabant

Metnaðarfullt og vel unnið. Vessar tónlistarinnar komast vel til skila á frumlegan hátt. Okkur er skemmt.

Hafdís Huld: Tomoko
- höfundar myndbands: Hafdís Huld, Álfrún Örnólfsdóttir og Helen Woods

Einfalt og skemmtilegt eins og lagið sjálft. Hugmynd sem virkar þrátt fyrir einn ramma. Segir sögu.

Ghostigital: Northern Lights
- höfundar myndbands: Alexander og Kristján Zaklynsky

Hrátt og ferskt. Fullkomlega í anda tónlistarinnar, syndir á móti straumnum. Gott í lognmollu.

Plötuumslag ársins

Lay Low: Please Don´t Hate Me
- hönnun umslags: Villi Warén

Myndskreyting og letur vinna mjög vel saman. Endurspeglar gleði og kraft en um leið visst sakleysi og einfaldleika sem einkennir tónlistina. Myndbyggingin vísar skemmtilega í titilinn: Lay Low. Lína sem gengur sem rauður þráður í gegnum allan pakkann og teikning af listakonunni sem liggur á línunni. Lágstemmd hönnun en um leið kraftmikil vegna sterkra kontrasta hvíts og svarts.

Ampop: Sail to the Moon
- hönnun umslags: Isak Winther

Lætur lítið yfir sér en við nánari skoðun kemur hún sífellt á óvart. Prentunin og pappírsvalið óvenjulegt. Áferðin á pappírnum og mynstrið vinna vel saman og mynda eina skemmtilega heild. Lágstemmt samspil ljóss og skugga. Endurspeglar dulúð og vekur upp forvitni til að skoða innihaldið nánar. Býður uppá að maður vilji handfjatla diskinn.

Toggi: Puppy
- Alli Metall

Stílhrein og falleg hönnun. Sterkir kontrastar sem skila sér utan sem innan í umslaginu. Einföld og sterk form sem eru áleitin vegna mikilla andstæðna á milli ljóss og skugga. Áhugavert og stendur með innihaldi disksins.

Bjartasta vonin*

Elfa Rún Kristinsdóttir

21 árs gamall fiðluleikari sem gerði sér lítið fyrir síðastliðið sumar og bar sigur úr býtum í einni virtustu tónlistarsamkeppni hins klassíska tónlistarheims, Bach-keppninni í Leipzig. Elfa Rún hefur tekið nokkuð virkan þátt í íslensku tónlistarlífi þrátt fyrir að vera enn við nám í Þýskalandi – spilað með ýmsum kammerhópum og heillað hlustendur með djúpri og innlifaðri túlkun og óaðfinnanlegri tækni.

Jakobínarína

Efnilegasta hljómsveit landsins, skipuð kornungum piltum sem hafa fundið sinn einstæða kraftmikla tón. Þeir vöktu mikla athygli öðru sinni á Airwaves eins og sjá má af umfjöllun innlendra og erlendra tónlistargagnrýnenda og blaðamanna og slógu í gegn á tónlistarhátíðinni South by southwest í Austin, Texas.

Pétur Ben

Vakti mikla athygli á árinu með frábærri fyrstu plötu og tónlist við kvikmyndina Börn. Afburðagóður hljóðfæraleikari með mikla útgeislun á sviði og spennandi lagahöfundur sem gaman verður að fylgjast með áfram.

*Rás eitt og Rás tvö eru sérstakir samstarfsaðilar að verðlaununum Bjartasta vonin. Samstarfið felst m.a. í dagskrárgerð, hljóðritunum, kynningu á vettvangi evrópskra útvarpsstöðva (EBU) og á vef RÚV.